Dee nich moa unja Russlauntdietsche bekaunde Tjinstlarin Tina Wedel fiet vondoag eahren 70. Jeburtsdach. Dee Plautdietsch Frind gratuliere dee Senjarin!!!
Em plautdietschen Darp en Kirgisien
Tina Wedel word en eenem plautdietschen Darp enn Kirgisien jebohre. Aul eare Ellere en ea Frintschaft we seeja musikalisch. Noh dee Schol led see eenen technischen Beroof, dee mett Elektrizität to doone haud. Oba Musitj en Literatua bleef wichtich en earem Lewe.
Konzert von Tina Wedel. © Horst Martens
„Kraunkjes“ es ea jratsta plautdietscha Hit
Von 1993 aun lewt Tina en Dietschlaunt. Eare Leeda schrifft en sinjt see en Dietsch en Plautdietsch toop mett earem Entjel Max Hermann. Bekaunt send „Heimatlied“, „Sonnenblumen“, „Liebe kennt keine Grenzen“. Toop mett dem Komponist en Musitjproduzent Andreas Melzer haft see vel Alben rutjejeft. Butadem haft Tina uck CD’s mett plautdietsche Leeda veöffentlicht so aus „Witte Roose“ oda „Dise Uege“. Ea jratsta plautdietscha Hit es woll „Kraunkjes“ (Kraniche). Tina Wedel ess doafea bekaunt, daut see jiedre Halle felle kaun. Op jeden Faul ess see dee plautdietsche Tjinstlarin met dem jratsten Publikum.
Katharina oda Tina Wedel wohnt enn Bonn. Eare Hobbies send Sinje, Leeda schriewe, Veaunstaultinje organisiere, Molarie, Musitj, Fotografiere, Filme. Eare leewste Musik send Klassik en Schlager. Se redt Dietsch, Russisch, Kirgisisch, Plautdietsch.
Met eahre Fans kaun see leida weajens Corona nich. Oba aula woare aun eah dentje.
© Martens
