Ruben – Die Schlange im Hirsefeld
Roman von Horst Martens, 472 Siede – Twee-Back Verlag – 2014
Etj fang aun to lese en befinj mi aunfänglich em Scheentola Bosch em Chaco. En twee Rechtunge: Eenmol, wiels de ieschta Deel vom Buak soo heet, oba uck, wiels dee veschiedne Opptietjnunge von dee Roman-Bedeelichte schienboa onewasechtlich send. Oba je wieda etj les, om soo meeja kaun etj tweschen dee Beem derchseene, dee Ereijnisse woare ewasechtlich, veständlich …
Ruben woat dann en Berlin en siene tweschentietliche Wohninj vonne Polizei besocht en utjefroacht, wiels hee aus Tjint aum Doot von eenem Frind metschuld habe saul…
Dann befinj wie ons wada em paraguayischen Chaco. En wiels de mennische Nomes em Meddelpunkt vonne Haundlunge stohne, kome bie eenen Mennist uck fuats Froage opp: Wea es jemeent? Wem tru etj dit ooda jant too, waut em Buak to lese es? Daut mot doch Woah senne, waut en dissem Buak met soone wertjelje Figure aufspelt, en een Mennist liecht nicht, uck nich bim Schriewe.
Buchlesung in der eigentlich schon geschlossenen "Sonne".
Horst Moates – hee tjemt ut Nielaunt, en es aus Journalist en Dietschlaund en jeewda Schriewa – beschrift dee Chaconatua en daut Wada so gaunz aicht – hoat, oba onfejlitjboa scheen fe dee Chacobewohna. En hee haft daut seeja goot jeschauft, Ruben en siene Lewensbejleita enn form von lota jemoakte Notize enne feschiedne Statione entoordne.
Ruben es veleeft en Claudia, oba de strenje „mennische Reajle“ vehindre, daut see ere Leew lewe derwe. Hee traijt enne Pilcomayojeajend, tjemt aus „hoarmloosa Mennist“ en President Streessna sien Umfeld en erleft den Putsch von 1989.
Uck en Dietschlaund em Prozass von dee Wadaveeenjung tjemt jee nen. Hee haft schienboa emma Jletj, doa too senne, woa waut wichtjet passiet, en woat doaderch Deel von groote Ereijnisse em 20. Joahhundat von Paraguay en Dietschlaund, dee doaderch opfallich dicht metenaunda vebunge woare: Derch den Kaumpf om Frieheit von Völtja en eenzelne Persoone.
En Europa – woat Ruben schwoa krank. Eene Folj von dem Schlangebiss enne Tjindheit em Chaco? Hee fellt em Koma en „erleft“ doabi nochmol dee Jeschicht von sienem Voltj em Schnallprozass: Amsterdam, Danzig, Russland. En aullaweajens siejt hee „siene“ Claudia. Eene onkonventionelle Idee em Berlina Charité fieht doahan, daut hee jesund woat.
Ruben tjemt wada nom Chaco, vewerktlich den Droom vom Pilcomayo, wohnt met Menniste en Indiauna toop. Daut es oba noch nich aulles …
Aufheiwe, utstieje ut dee bekaunde, vetrude, – heele? – Welt, daut wull Ruben aul emma, aus nu en Europa, en Nielaunt ooda aundaschwua.
En hee schauft daut uck aum Enj met siene „jeschedne“ Jugendleew. Met Claudia heift hee auf om en eenen „niejen Himmel“ to entretje, woa hee sien Lewe lewe kaun …
Langsaum oba secha entsteiht bim Lese ut dem Puzzle een kloaret Bild, daut Senn moakt, en spaunnend es doatoo. En soo froag etj mi aum Enj, tus aunjekome: Woone Spure hinjalot etj, en wea siejt doano?
Finj etj mi, mine Femilje, mine Frind, ooda wem audren en daut passiede, om ut mine Situation uttobreatje, entweda, om mi von Traditioone auftowande, ooda om noch en deepre Traditioons-Jleise to launde?
Moates, de Journalist, vesteiht daut, derch dee Ereijnisse – ewa meist een Joahhundat lang – Mensche to schildre, de jewoacht habe ut to breatje, om dann wada von de Vegangenheit ennjeholt woare, bloos om disse wada jewessamote jeordnet tridj to lote.
Ruben … Bietsch au ne Jeftschlang – heet aus dee Chacosonn – knostrich aus daut Loagafiea …
Uwe Friesen, Ebenfeld, Menno, Paraguay