Mensche tjene noh veschlapte Aunjehieje forsche
Daut eehemolje KGB-Archiv enne Ukraine ess fe aula op. Aunjehieje von tiehndusende Menniste, dee enne 30-tja en 40-tja Joahre enne Ukraine inhaftiet were, tjene nu ewa een nieet Prograum biem Zentrum fe transnationale Mennonitenstudien (CTMS, Centre for Transnational Mennonite Studies) wiedre Informatioone aunfordere. Daut stund em Canadian Mennonite, jeschrewe von Will Braun.
Faulsche Aunschuldunge
Dee meschte faustjenohmne Menniste worde oppgrunt von faulsche Aunschuldunge unja dem stalinistischen Regime toom Doot oda too Dwinjoabeit veuadeelt. Vele worde niemols meeha jeseehne. Dee Aunjehieje worde meist niemols informieat.
Ejne Metoabeida em Archiv
Daut aune Universiteet von Winnipeg unjajebrochte CTMS well Anjehieje von dusende vemisste Menniste halpe to erfoahre, woo eahre Veafoahre jeblewe sent. Daut Zentrum haft Metoabeida em eehemoljen KGB-Archiv enne Ukraine en freit sich ewa Aunfroage too bestemmde Persoone. Dee KGB-Dateien enthoole oba nich Informatioone ewa aule vemisste Menniste.
Aileen Friesen, dee Co-Direktorin vom Centre deeld met, daut dee Akten moa Informatioone von Mensche enthilde, dee nich enn Massendeportatioone wajchjeschetjt worde en lota rehabilitieat worde. Dee Akte betratje sich opp Persoone, dee tweschen 1933 en 1947 faustjenohme worde.
Mol weinich, mol meeha Infos
Deelwies kaun daut Centre grundlajende Informatioone doarewa reedstale, waneea dee betrafende Persoon vehaftet word, woont dee Aunkloag we en too waut fere Strof see veuadeelt word. Maunchmol jefft daut een Foto. Enn eenje Fale jefft daut uck noch wiedagohnende Infos.
Aunfroag ess kosteloos
Dee Aundrachstalasch sele eenen Nome, daut Jeburtsdotum, eenen Jeburtsot en uck dee Ellre vonne betrafende Persoon aunjewe. Dee Metoabeida derchsetje dan dee KGB-Dateie en jewe dee entspreatjende Dote wieda.
Dee Aunfroag ess kosteloos en saul aun disse Mail-Adrass jeschetjt woare: ctms@uwinnipeg.ca.
Dokumente jesocht
Aileen Friesen empfehlt, oppe Siede von Willi Vogt to setje, ver aulem wan maun Rusch kaun: https://chort.square7.ch/to. Willi Vogt haft vel Nomes ute Rehabilitationsbetja.