Ver Kortem rand em NDR en opp phoenix eene Reportage ewa dee Russlauntdietsche enne AfD. Dee Reporterin tjand sich seeha goot enne Szene ut. Stald sich rut, daut see sogoa eenen perseunlichen Toogang haft. Kyra Funk haft selfst russlauntdietsche Wartle.
Uck Plautdietsche kome to Wot
Ewa dissen Film kunne sich Russlauntdietsche mol freie, wiels see sich foaken en besondasch enne Medien faulsch vestohne feele. Wiels uck Plautdietsche to Wot kome (ohne auls soone betetjend to woare), well etj den Film hia besondasch empfehle, dem et enne NDR-Mediathek en bie YoutTube jefft. Bie Youtube lat sich ute Kommentare schlute, daut vel Russlauntdietsche den Film em faulschen Hauls jetjreaje hawe oda eefach moa schindiere.
See ess „eene von onse“. Kyra Funk – Portrait von Carolin Windel.
„Plautdietsch erinnat mie aun mien Tus“
Kyra Funk unjanemmt met eahrem oolen Bulli eene Tour, om dee Atmosphere en dee politische Aunsechte vonne russlauntdietsche Community to dokumentiere. See oabeit enn Hamburg auls friee Journalistin, Filmmoakarin en Podcasterin. Jebore word Kyra Funk 1989 enn Bielefeld – dee mennische Hauptstaudt von Dietschlaunt – auls Dochta von russlauntdietsche Utsiedla ut Kirgistan. Eah Uagrootvoda Bernhard Harder we Met-Jrinda vonne eschte Mennonitenjemeind enne Staudt. See sed to menno-welt.net: „Dee plautdietsche Sproak woat mie emma aun mien Tus dentje halpe, en aun mienen Oopa, dee mie aul gaunz tiedich Jeschichte opp Plautdietsch vetald.“ Bie ons word unja Frind en Frindschauft diskutiet, nohdem wie den Film sage: Ess Kyra Funk eene „von onse“? Nu weet wie Bescheid.
Dee Reportage von Kyra Funk opp Youtube.
See well ewa Onjerajchtichtjeite opptjleare
2013 absolvied see eahren Master enn Journalistik en Kommunikatioonswetenschaufte enn Hamburg. Noh eahrem Uni-Aufschluss fong see auls Videoredakteurin biem stern aun. Doa oabeid see fe doagesaktuelle Bejewenheite, oba uck aune Entwetjlung von Videoformate fe stern oda neon.de. Vondoag ess see auls friee Journalistin aum Woatj. Besondasch erfolchritj we eah Podcast „Toxic Church“ ewa dee Hillsong-Organisatioon. „Den Status Quo hinjafroage, ewa Missstende en Onjerajchtichtjeite opptjleare, Mensche eene Stemm jewe“ – daut ess eah Leitmotiv. Wea meeha ewa Kyra Funk weete well: www.kyrafunk.de.
„Enne jreene Tjist, daut sie etj“
„Hia enne jreene Tjist, daut sie etj, Kyra Funk. Auls Tjind von russlauntdietsche Utsiedla sie etj auls eschte Jeneratioon von miene Familje enn Dietschlaunt jebore. Doamet haw etj eenen Migratioonshinjagrunt. We mie lang goanich so wertlich kloa.“ Soo fangt dee TV-Berecht aun, dee met Video-Oppnohme ut eahre Tjindheit bebildat ess. Soo weete dee Tootjitjasch von Aunfang aun, ut woone Perspektive see berecht.
Jratste Mindaheit met Stemmrajcht
Dee Film belicht daut massive Woawe vonne AfD om dee russlauntdietsche Community, dee met 2,5 Millioone Mensche enn Dietschlaunt „dee jratste Mindaheit met Stemmrajcht doastalt“ (O-Ton Reportage). Opp eahre Tour noh dee Jespreatjs-Poatnasch red Funk to-escht met dem Autowoatjstow-Leita Waldemar Schneider, dee uck eahren Bulli trajcht mok. Von ahm hied maun quasi stalvetredend daut, waut vel Utsiedla dee dietsche Jesalschaft veaschmiete. Ewa siene Ennwaundrinj: „Wie were Butensieda, Utlenda ewent. Maun haft ons nich integriet.“ Ewa Vea-udeele: „Doa we wie dee Faschiste, hia dee Russe.“ Ewa Wohle: „Dee Lied woare sich aun dee Partie klaumere, met dee see sich identifiziere tjene.“ Ewa dissen Sautz kaun maun sich vefiehre: „Ditt ess eene Jesalschauft, dee ons nich meeha jefellt. Ditt ess tjeen demokratischet Launt meeha.“ Bie dee latzte Utsoag gauf dee Reporterin Jeajenred.
Autorin Elina Penner ewa Russlauntdietsche
Kyra Funk bejeajend Elina Penner, eene plautdietsch-mennonitische Schreftstalarin. Elina eahre Betja „Nachtbeeren“ en „Migrantenmutti“ send biem bekaunden Aufbau-Verlag rutjekome en biem Lesepublikum seeha beleewt. Biem Verein „Plautdietsch Freunde“ jewonn see den „Arnold-Dyck-Pries“. Den Bejriff „Russlauntdietsche“ vesetjt Penner to vemeede – wiels hee velmols faulsch vestohne woat en to negative Stereotype feht. Den Utdruck „Dietsche met ruschem Pauss“, dee onrajcht opp Elina aunjewaundt word, sitt see auls „politisches Statement“, wiels eahre dietsche Identitet hinjaridsch enn Froag jestalt woat. Penner behaupt, daut vel Dietsche dee Kwol, dee Russlauntdietsche unja Stalinismus und Deportation erfuhre, onbekaunt ess. (Vel russlauntdietsche Plautdietsche weete oba uck nuscht von eahrem ejnen historischen Hinjagrunt.) See strewde doanoh, noh Dietschlaunt, dem Launt von eahre Veafoahre to kome. Dort aunjekome, wulle see sich bewiese en „dietscha auls dietsch“ senne, met eenem ejnen Hus en eenem dietschen Auto enne Oppfoaht. Daut Fausthoole aum tjristlichen Familjebild we uck karaktaristisch fee eenen grooten Deel von disse Jemeenschauft.
Kyra vetalt sich met Onkel Peeta
Met eahrem Onkel Peeta tjemmt see enn eene osteuropeische Et-Laufte toop, woo maun, Originaltoon Peeta, „dee goode Sache ete kaun: Wareniki, Tschebureki, Schaschlik“. Met eahrem Onkel vesteiht see sich goot, oba manchmol kauble see sich weajen unjascheedliche Meeninje. Kyra meent, daut Russlauntdietsche en aundre migrantische Kulture vel jemeensaum hawe, Peeta stemmt nich too. Ahm jefellt nich, daut em Tjinjagoade ut Respatjt opp muslimische Tjinja opp Schwiensfleesch vezichtet woat. „Du (aulso dee Utlenda) tjemmst enn een Launt en jleewst, daut sich dee aundre (aulso dee Hiesje) aunpausse?“ Daut kauna nich vestohne.
Ewaderchschnettliche Wete fe dee AfD
Dee Journalistin haft vel Enndretje jesaumelt. Oba stemme dee Enndretje uck mette Fakte ewareen. Eene Reis noh Österreich steiht aun. Dr. Jannis Panagiotidis, Leita vom Forschungszentrum fe Transformationsjeschicht enn Wien, sajcht: „Daut Klischee, Russlauntdietsche sent mehrendeels AfD-Wehla, traft nich too.“ Sien Forschungs-Schwoapunkt licht opp Migrationsstudien en dee Jeschicht vonne Russlauntdietsche. Hee ertjleat: „40 Prozent vonne Russlauntdietsche wehle konsequent linjsch vonne Medd.“ Dee meschte sate eah Tjriez bie dee CDU. Daut ess aulso nich soo, daut aule Russlauntdietsche rajsch wehle. Nich aula – oba een groota Deel. Daut bewiest eene von ahm derchjefehde Unjasetjinj. Panagiotidis stalt faust: „Em Vejlitj to dee Jesamt-Beveltjerinj erretjt dee AfD ewaderchschnettlich hohe Erjewnisse.“
Dietschtum, Russlaunt-Bezug, tjristliche Wete
Aundre Ertjantnisse vom Forscha ut Wien stale faust: Dee Solidaritet unja Migrante ess jerinj, wiels see sich foaken enn Konkurrenz to-eenaunda seehne. Woat argumentiert: „Wie hawe ons aules hoat er-oabeit, wehrend aundre Migrantengruppe aulles jeschentjt tjrieje.“ Rassismus en Islam-Fientlichtjeit sent present, oba daut jelt uck fe gaunz Dietschlaunt. „Dee AfD vesetjt, dee Russlauntdietsche von mehrere Sied to ve-ennehme“, so Panagiotidis. Doabie woat dee „dietsche Identitet“ (auls Dietsche aunertjant to woare), dee Vebungenheit to Russlaunt en eene „tjristlich konservative Utrechtinj“ besondasch betoont.
AfD fe Tjriste nich wehlboa
Om eenen Bletj opp dee tjristlich-konservative Sied to schmiete, besetjt Kyra Funk Lena Rothfuß, dee eahre Wartle enn eene Frietjoatj haft, soo auls vel Russlauntdietsche. Jemeensaum bereede dee beid daut Unkast vea. Daut jefft Wareniki en Funchosa (ohne Glausnudle). „Irjentwoo fung etj daut goot, enn eene Wete-Jemeenschauft oppjewosse to senne“, betoont Rothfuß. Vondoag sitt see daut kritischa: „Dee Oat en Wies, woo daut (Tristentum) enne Jemeindes utjelewd woad, ess eene aundre Welt, dee mie nich meeha aunredt.“ Sie stiet sich doaraun, daut Frues weinich bit nuscht enne Jemeindes to saje hawe. Daut dee AfD uck enne Frietjoatje Erfolch haft, kaun see nich vestohne: „Etj sie ewazeucht, daut jemaund, dee tjristliche Wete vetrat, dee Partie nich wehle kaun.“
Russlauntdietsche AfD-Politikerin
Wiels dee soo eejemolje Utsiedla so dicht bie dee AfD sent, deff maun sich nich wundere, daut sich bie dee Russlauntdietsche uck politische Karriere entwetjle. Een Biespell ess dee AfD-Bundesdachs-Aufjeordneta Eugen Schmidt, dem dee Medien aul auls „Putins Propagandisten im Bundestag“ betetjent hawe. Uck dee Hamburger AfD-Politikerin Olga Petersen well ewa dee AfD noh bowe: „Enn Russlaunt sie etj dietsch jeblewe. Enn Dietschlaunt welle se mie daut vebeede“, sed see enn eene Red. Eene Utsoag, dee provokativ wirtjt, oba weinich Substanz haft. Oppe Froag, woo eahre Partie tjristliche Wete vetret, auntwod Petersen: „Well etj eene islamische Jesalschauft, goh etj enn een islamischet Launt. Well etj eene tjristliche Jesalschaft, goh etj enn een tjristlichet Launt.“ See ess soo jeseehne jeajen eene opne Jesalschauft. Wooromm Russlauntdietsche noh eahre gaunze Erfoahrunge met dem Totalitarismus eene ondemokratische Ideologie goot finje, ess een Rotsel.
„Dee Grupp ess divers“
Weahrent eene Lesinj von Elina Penner fangt Kyra Funk en Jespreatj met eene Familje met russlauntdietscha Heakonft aun. Eene Frau sajcht: „Wie hawe ons aunjepaust. Oba trotzdem jeheht maun nich doatoo. Maun at tjeene Königsberger Klopse, maun at Golubzi.“ Daut kunn dee Bilanz von disse Reportage senne. Oda om ditt mette Wed vonne Reporterin to formuliere: „DEE Russlauntdietsche jefft daut nich. Dee Grupp ess divers, en daut sent uck eahre politische Meeninje.“
Horst Martens