Enn dissem Somma besochte ewa 30 konservative Mennonite ute Regioon Chihuahua, Mexiko, en uck ut Belize historische mennonitische Stede enn Dietschlaunt, Hollaunt en Polen. Dee Mexikauna stade opp vel Nieet en opp Wadasprichlichet.
Johann-Peter Wiebe, Veasetta vom Mennonitischen Arbeitskreis Polen, wees dee Grupp, woo dee Mennonite enne tridjlidjende Joahhundade enn Europa lewde. Viktor Sawatzky haud dee Reiseleitung.
Mexikauna wiese opp eenst Interesse aun Euroopa
Dee Deelnehma, Metjlieda vonne konservative Tjliene Jemeend, dee eene evangelikale Erwatjung erlewt haft, haude moa bejrenztet Weete ewa Euroopa. Eenje hieade toom eschten Mol, daut ver 80 Joah dee Tweeda Welttjrich toobd. See sage Euroopa met aundre Oge auls dee derchschnettliche Touriste. Daut platzliche Interesse aum oolen Kontinent diedt opp eene Ve-enderung von eahrem Dentje han.
Schockieat von Münster
Johann-Peter Wiebe berecht, daut dee Grupp „schockieat“ ewa dee „grausame Jeschicht von Münster“ we. Daut Deeparitj von Münster hinjaleet eenen deepen Enndruck. Enn Asperen, Hollaunt, oba were dee Meddelamerikauna bejeistat, auls Wieb dem heldenhaften Doot vom Märtyra Dirk Willems schildat.
Historische Tjoatje vondoag
Dee Mexikauna wulle weete, woo Mennonite vondoag enn Euroopa lewe. See leete sich ewa dee aktuelle Jemeendes enn traditionelle mennische Ote soo auls Witmarsum, Pingjum en Haarlem informiere. See were ewarauscht, daut Frues den Gottesdeenst leide en soogoa predje. Ewa den Metjlieda-Schwunt were see trurich. Noh eahre Meeninj ess dee „moderne“ Ennstalinj dee Grunt fe dem langsaumen Vefaul vonne fotschrettlich utjerechte Tjoatje. Dee Besetjasch selfst hilde aun eahre Traditioone faust. Jieden Dach gauf daut Aundacht met Predicht, Jesang en Jebed. Emma wada sunge see eahre Leeda enne Tjoatje, waut dee Toohierasch beenndruckd.
Wundre en bewundre
Dee Touriste ut Chihuahua besochte uck dee Stede enn Danzig en runtom, woo dee Menniste wirtjsaum were: daut Museum enn Tiegenhof, dee Staudt Danzig en eenen Tjoatjhoff. Dee Besetjasch bewundade dee wirtschauftliche Erfolje enne Wiessel-Regioon, wundade sich oba seeha, daut dee Menniste enne Produktioon von Alkohool erfolchritj were. See selfst lehne Alkohool auf.
Met vel deepgohnende Enndretje reisde see tridj noh Mexiko en woare vele von eahre „Jeschwista“ doatoo aunreaje, uck eene Reise noh dee oole Heimat to moake.
Les uck: Mexikauna fiere 100-joahschet Jubileum – Plautdietsch-Freunde e. V.