Dee niee Utgow von Plautdietsch Frind tjemmt kort ver Wiehnachte rut. Daut Haupttheema heet: „Dietsche Menniste em Dredden Ritj“. Uck vel aundre Berechte en Jeschichte enthelt dee Tiedschreft.
Nuscht Goodet to vetalle
Mehrere Berechte beschaftje sich mett dee Doaginj vom Mennonitischen Geschichtsverein enn Münster. Wetenschaftla, Vereensmettjlieda en Interessiede kaume doa toop, omm doarewa to rede, woo sich dee Mennonite enn Dietschlaunt enne Nazitied vehoole hawe. Soovel kaun etj em Verut saje: Daut jefft nuscht Goodet to vetalle. Tjeen Mennist haft sich jeejen Hitla jewandt, em Jejendeel: Aula were see bejeistat vonne Diktatua. Oba goot, daut endlich mol doarewa jeredt wordt. Scheen, daut sich dee uck aul oole Sehns to Vefügung stallde en ewa dee Hangow von eare Ellere nohm Dredden Ritj rede.
Daut Titelbild vonne Tiedschreft (nich von dissem Artitjel) wiest eene Schatulle von eenem „Sehn“, dee een Ewabliefsel enthelt ut janne Tied: een Muttatjrietz mett Hoaketjrietz. Daut well etj aun disse Sted nich aufbilde, daut man nich opp faulsche Jedanke tjemmt.
Vel interessaunte Biedrej
Jiedenfauls jefft daut noch viel aundre Artitjel: ewa rusche Filmmoakasch, dee eenen interessaunten Dokumentarfilm ewa mexikaunsche Menniste jedreit hawe, ewa een 102-Joahsche, dee sich noch aum Terror von Nestor Machno erinnere kaun en uck Berechte ewa eene seeha interessaunte Plautdietsch-Doaginj enn Detmold. Veajestallt woad een Bok ewa dee Architektur vonne Menniste enne Ukraine.
FRIND-Mettjlieda tjrieje een Heft ommsonst tojeschetjt. Aule aundre motte sich daut selfst bestalle: Plautdietsch Frind, Plautdietsch-Freunde e.V., Georgstraße 24, 32756 Detmold, Tel: +49 (5231) 921662, info@plautdietsch-freunde.de. Een Exemplar kost: 10,- Euro.