Plautdietsche Footbaullarin spelt nu fe Frankfurt

 Dee aktuella Champions-League-Jewenna Frankfurt en dee 137-molje Nationalspelarin eenijde sich opp eenen Vertrag, dee bitt tom 30. Juni 2016 jeiht. Bie dee WM emm ejnen Launt tald dee 27-joahsche Meddelfletj-Spelarin to dee Leistungsdreajarinne von eare Utwohl. Biem 1:0 jejen China emm eschten Spell word see sogoa aus „Spelarin vom Spell“ jewehlt.  Sophie Schmidt haft mennische Veafoare, paraguayische Ellere – en een Germanistik-Studium aune Universität Portland aufjeschlote. Tolatzt spedl Sophie biem Sky Blue FC enne amerikaunsche Profiliga NWSL.

Diss Artitjel staummt utem Archiv: Frind 27, 2013

Sophie eare schoape Schüsse

Dee plautdietsch-kanadische Footbaulspelarin Sophie Schmidt jewonn fe Kanada eene Bronzemedaille

Aus aum 19. Juni 2013 dee dietsche Frues jeajen Kanada Footbaul spelde, we uck eene Plautdietsche oppem Fletj. Sophie ess Staumspelarin em Meddelfletj mett dee Numma 13 en haft eene Bronzemedaille bie dee Olympische Spells fe Kanada jewonne. Em Moment spelt se fe eenem Verein dicht bie New York. Sophie Schmidt ess enn Winnipeg, Kanada, jebore, oba eare Ellre staume ut dem paraguayischen Filadelfia.

Elmer en Cornelia Schmidt sent beid enn Filadelfia, Paraguay, oppjewosse en waundade dann noh Kanada ut. Oba aus Sophie dree Joah oolt we, kaume se wada tridj noh Filadelfia. Donn word Sophie eare Leidenschaft fe Footbaul jewatjt, berecht daut „Mennoblatt“. Noh eenje Joahre siedelde dee Schmidts wada noh Kanada omm, dittmol noh Britisch Kolumbien. Enn eare Frietiet besochte dee Tjinja Footbaulschoole.

Sophie speld aus een Jung

Sophie foll derch ea Talent en eare Energie opp. Aus ea Pa mett ahr nohm Footbaul-Training foh, omm siene Dochta veatostalle, froch ahm dee Traina, nohdem hee daut Tjint biem Spele beoobacht haud: Oba du weetst doch, ditt ess een Meatjes-Team?“ „See speld soo hoat en energisch, dee Maun kunn nich jleewe, daut Sophie een Meatje we“, vetalld Elmer Schmidt dem Reporter Dan Kinvig vonne Abbotsford News. Dee Reporta beschreef dann, woo sich dee gaunze Aunjeheje, dee Frind en Bekaunde vonne Kingsroad Breedajemeind troffe, omm eare Sophie to gratuliere fere Goldmedaille bie Olympia. Dee Menniste, waut doa vesaumelt were, vetallde dem Reporta vel Schnette ut dem Lewe von Sophie. Uck disse: Bie eenem Schoss-Training schmeet dee Dooafru eare Haundschtje wajch. See wull tjeene Balla von Sophie meea jriepe, wiels eare Henj soo brennde. Sophie schoot eefach too schoap.

Bie soonem Schnied we daut tjeen Wunda, daut sich dee Erfolch boolt ennstalld. Aul mett 16 Joah mok see ea eschtet Lendaspell – jeajen Hollaunt. See jehed von donn aun aus Numma 13 emma dee kanadsche Nationalmaunschauft aun. Mett 20 Joah naum see tom eschten Mol aune Olympische Spells deel, 2008 enn Peking. Bie dee Olympische Spells enn London 2012 jewonn Kanada dann dee Bronzemedaille. Bie dee Footbaul-Weltmeistaschafte rand daut nich soo goot fe Kanada – bie dee WM enn Dietschlaunt scheede dee Ahornbleda aul enne eschte Rund ut. Oba doafea holde see enn vel aundre Turniere goode Platza fe Kanada rut.

Niea Start enne USA

Nohdem Sophie neajen Joah fe dee Vancouver Whitecaps jespelt haud, watjseld see ewa dem Ozean en unjaschreef eenen korten Vertrag mett dem schwedischen Footbaulclub Kristianstads DFF, omm eene velatzte Spelarin to ersatte. Boolt doanoh word see Spelarin vom Sky Blue FC en New Jersey, nich wiet auf von New York. Dee Club word escht 2012 extra fe dee niee National Women’s Soccer League enne USA jejrindt.

Tatjst: Horst Martens