Elena Penner en Pauline Klippenstein hawe auls „plautdietsche Mejale“ opp Instagram grooten Erfolch
Elena Penner en Pauline Klippenstein (beid een bestje ewa 30 Joah oolt) kaun maun opp Plautdietsch Ennfluss-Nehmarinne nane. Opp Dietsch sent daut Influencerinnen.
Ewa 17.000 Follower
See hawe opp „Insta“ – ellre Mensche saje Instagram – eene wichtje Presenz (www.instagram.com/plautdietschemejale/) fe plautdietsche en russlauntdietsche Mensche. Met ewa 17.000 Aunhenja, meschtens Follower jenant, deele see eahre Meeninje, Erfoahrinje oda jewe Tipps. Wea weet aul soo vel Plautdietsche hinja sich?
Sproak, Kultua, Privautlewe
Dee Plautdietsche Mejale send enne Utgow Nr. 48 em Somma 2024 oppem Titel jelaundt. Em Schwoapunkt „Medien“ stalld wie butadem vea: Irina Unruh – Dokumentarphotographin; Orlando Braun – Filmmoaka.
See wohne enn Hüllhorst em Tjreis Minden-Lübbecke, doa sent Dusende Menniste. Eahre Theemasch sent Plautdietsch, Russlauntdietsche Kultua en oba uck eah ejnet Privautlewe.
(6) Plautdietsch Freunde | Facebook
Eschta Kontakt oppem Darpsfast
Elena en Pauline tjande sich nich aul emma, soo auls maun vleicht bie Menniste dentje wudd. Ver meist 20 Joah, see jinje noch noh School, troffe see opp eenem Darpsfast oppeenaunda, wiels see moatjde, daut see beid Plautdietsch kunne. Butadem staume see beid utem Altai enn Russlaunt, daut schweesst uck toop. „Plautdietsch haft ons to Frindinne jemoakt“, saje see. Nich moa daut Plautdietsch we jemeensaum, dee Famieljes von beid haude een ehnlichet schlemmet Schitjsol unjrem Stalinismus erlewt. Daut vebunk. Dee Famieljes sent groot, Grootfamieljes. Pauline vetahld dem Magazin „Kontakt“: „Vondoag, wan wie mette gaunze Famielje ons trafe, sent wie ewa 200 Maun.“
Jeschicht wichtich moake
Aune 2019 fonge see dan met eahrem Kanol aun en moatjde boolt, daut vele Mensche ut eahrem kulturellen Omfelt doaropp reagieade. See haude aunfangs moa ne blausse Ohninj, woohne Lienje see vefolje wulle, oba eent wissde see jenau: „Von ons (Plautdietsche) woat enn Dietschlaunt meist nuscht vetahlt. Tjeena interessieat sich fe ons“, sede see to dee Tietschreft „Kontakt“.
Wea sent wie?
Oba daut we uck soo, daut vele Plautdietsche en Russlauntdietsche weinich ewa eahre ejne Jeschicht wisste. „Wea sent wie?“ froage dee Meatjes en eahrem Blog. Vele weete dee Auntwot bit vondoag nich.
See welle dee Jeschicht met dee Oge von junge Mensche vemeddle. En Plautdietsch nieet Lewe ennhauche – enn jiede Jeneratioon jeiht een bestje meeha veloare, saje see.
Goh Hunj luse!
Daut jeiht meschtens seeha entspaunt too. See moake uck vel Witzjet en Clips doatoo. Unja dem Titel „Russlanddeutsche Fakten“ lote see ewa den Senn von koomische Redewendunge diskutiere – soo aus „Goh Hunj luse!“ oda „Goh Ente maltje!“. „Holtstjebatj“ ess een aundret Wot – soo worde oppdrinjliche Junges betetjent.
Schwoatet Golt oppe Tweeback
Daut jefft bie den Rubritje soo aus „Friedach red wie Plautdietsch“, Musitj, Kulinarischet. See tratje sich bunt-rusche Tjleeda aun en stale toom Biespell „Nachtbeeren-Marmelade“ vea – „das Schwarze Gold vom plautdietschen Volk“. Met eahre Clips rede see aules aun, waut eenen plautdietschen Jeist beschaftijt.
See vedeene uck Jelt
Aum Aunfank were see noch ajchte Mejale, vondoagschen Dach sent see befriet en hawe Tjinja. Daut Poste von Biedreaj opp Insta motte see sich oppdeele. Aun een poa Doag enne Weatj ess Pauline doafea toostendich, aune aundre Doag Elena. Oba daut ess nich moa toom Vejneje. See vedeene uck doaderch Jelt, daut see Reklame fe veschiedne Produkte moake.
Vea-uadeele ewa Rusche
Ess oba nich aulet iedel Sonneschien. Dee beid Mejale moatje emma wada, woo vel Vea-uadeele ewa Russlauntdietsche omgohne. „Maunche Dietsche jleewe emma noch, dee Russlauntdietsche tjrieje Jelt biem Ennwaundre oda fots een gaunzet Hus jeschonke“, vetahlde see eenem Magazin. Kloa, dee Medien sent opp dee plautdietsche Influencerinne uck oppmoatjsaum jeworde. En jiedra Berecht feht ahn meeha Follower too.
Tatjana Klassner haft sich met ahn vetahlt – tjitj oppe neachste Sied.
Horst Martens
Elena Penner Pauline Klippenstein (@plautdietschemejale) • Instagram-Fotos und -Videos