Utem Archiv: Plautdietsch FRIND Nr. 27 / 2013
Rook ess een Koatespell, daut bie dee Plautdietsche, ver aulem ut Sud- en Nodamerika, seeha beleewt ess. Maunche nanne daut „Tjristlichet Spell“ oda „Missionoasch-Poka“.
Rook-Koate worde von Parker Brothers em Joah 1906 enne USA en uck enn Kanada ennjefeht, omm eene Alternative to Standard-Koate auntobeede. Dee Koate mett Bilda (Tjeenich, Daum, Jung, As) golle enne mennische Traditioon aus sindich en vom Diewel beennflusst – soo aus Jletjsspell en Koatelaje. Daut Rook-Deck besteiht ut 57 Koate: eene Koat mettem schwoaten Voagel (dee Rook), daut ess dee Joker, en 56 Koate, oppjedeelt opp veea Foawe: schwoat, root, jel en jreen. Dee Koate sent nummeriet von eent bitt vetehn.
Hia ess een Berecht ut dem Joah 2013. „El Pinguino“ schrifft ewa dee Rook-Liga enn Bechterdissen. Vondoag besteiht dee woll nich meeha, wiels dee Spelasch befriet send en serioos jeworde send. Oba Rook woat emma noch seeha jedujcht.
Daut baste Spell
Utem Lewe von eenem Rook-Weltmeista
N‘dach. Na nu well etj mol‘n besstje von mie vetalle. Schließlich sie etj sewenfacha Rook-Weltmeista en niemols nich well mie tjeena doatoo gratuliere. Etj dentj mol, wiels tjeena so rechtich doavon Notiz nemmt. Woo uck? Ons Rook-Kult-Club haft nich soo de Medienpräsenz aus de Footbaulbundesliga oda de Olympische Spells. Trotzdem hab wie jiedet Weatjenenj onse Meistaschauft utjedroacht. Aunjefonge hab wie, aus etj soo sasstehn word, daut ess daut Ella, wann maun bie ons enne Jugend tjemmt. Dee Jugend vonne Tjoatj natürlich, denn maun kaun bloos rechtich Rook spele, wann maun uck een rechtja Mennist ess.
De Vedoaftheit vom Koatespell
Maun doaf oba uck nich too fromm senne. Diretjt besied von onse Vereinsvefotung vom Rook-Kult-Club hab wie uck een oolet Traktat henje. Doa steiht aules ewa de Vedoaftheit vom Jletjsspell benne – daut bloos Doonichgoods eare Jugend mett dem Koatespell veschwende und doabie niemols nich Schätze emm Himmel saummle. „Oba maunchmol ess daut soo, daut maun fe sienen Erfolj uck waut enn Koop nehme mott“, docht etj mie. Schließlich kaun nich jiedra Rook-Weltmeista woare: Von nuscht tjemmt nuscht. Wie hawe ewa fefftehn Joah hoat trainiert. Enn Bechterdissen, dee Rookhauptstaudt vonne Welt. Vleicht weete daut nich vele, oba Bechterdissen ess fe Rookspelasch onsjefea daut, waut fe dee Footbaulspelasch Barcelona ess. Daut waut Mekka fe dee Moslems en vel meea. Daut wimmelt hiea von goode Rookspelasch, soo aus sest hechstens noch enn Nielaund oda Winnipeg.
Kamikaze 99 ess een Dratjsverein
Soo aus auleweajent oppe Welt, woo dee baste von earem Fach oppeenaunda trafe, jefft it hoade Konkurrenz. Emma jefft it twee Vereine, dee sich omme Wad striede. Emm Footbaull sent daut tom Biespell Barcelona en Madrid; Bayern en Dortmund oda Olympia en Cerro Porteno. Uck dee Rook-Kult-Club haud eenen Verein jeajen sich, dee aun Vedoaftheit nicht to ewatrafe ess – Kamikaze99! Maun kunn dem uck aus tweede Liga betetjne. Aus Dratjsverein. Dee spelde uck bloos so tom Tietvedrief ohne Aunstaund en Kultua. Daut we een Hohn fe ons, daut dee daut Spell ewahaupt rechtich bejriepe kunne. Disse Dommspupasch.
Etj well dee hia oba uck nicht too schlajcht moake, wiels maunchmol – enne Liga-ewajriepende Pokalspells – kunn daut uck mol tatsächlich veakome, daut eena vonne Dommspupasch jewennt. Jo, daut ess theoretisch meajlich, obwoohl tjeena nich so rajcht vesteiht wooromm, schließlich send wie dee eschte Liga, dee daut Spell escht soo rechtich kultiviet hawe.
Wie spele dem Jeajna domm en dämlich Bie ons tjemmt it aun goode Speldoag vea, daut wie bloos hundattachentich oda dreehundatsastich spele, wie sate uck mol sewenhundattwintich. Ons musst soogoa vebode woare, während dem Vedeele enne ejne Koate to tjitje, wiels dee Eschte, dee eene Eent jeseehne haude, fots hundattachentich roopde, dee Neajchste mett ne Eent oda dem Rook haude dann bloos noch dee Meajlichtjeit, opp dreehundatsasstich to gohne. Daut tjlinjt nu oba een bestje verretjt – ess it uck! Oba off Jie daut nu jleewe oda nich, jenau daut we bie ons dee basta Wajch tom Erfolch, soo aus daut scheene Kort-Pauss-Spell von Barcelona. Wie moake dem Jeajna eefach domm en dämlich.
Aus Messi jeajen Bielefeld
Daut Probleem we nu, daut dee baste Weaj emm Verein auleweajent aundaweajens diretjt ennt Vedoawe nenn fehd. Wann etj tom Biespell mette Familie speld en fots bie daut eschte hundattachentich beede deed, leete mie dee aundre eefach oppranne, ohne daut selfst to moatje. Selfst wann eena rechtich goode Koate haud, truda sich nich to beede. Ditt we emma eene Herutforderung fe mie, aus Rookweltmeista opp soonem oolen Acka jeajen disse schratjliche Darpspelasch auntotrede. Tuescht docht etj, etj wudd jiedren aundren Jeajna enn Grunt en Boddem spele. Oba daut we eefach nich soo, soo aus wann Messi mett Barcelona jeajen Arminia Bielefeld tjickd. Auleen ess kloa, daut dee DSC nich een eenzjet Dooa nich scheete wudd. Daut bleef bloos dee Froag, off Barcelona twee- oda dreestallich jewennt. Bie mie ess daut oba soogoa meajlich, aus Rookweltmeista jeajen irjent so eenem Dommkopp to velere, en dee Dommkopp moatjt noch nich eemol, woo domm hee ewahaupt ess. Jleewt mie. Daut moakt ewahaupt tjeenen Spoß. Doa spel etj doch leewa mett dee Profis, dee weete weinstens, wo goot wie sent. En jieda Meistatitel wiest mie emma oppt Nieje, wo goot etj wertjlich sie. Wie hawe soogoa eenen Pokal, opp dem aule Rook-Weltmeista stohne, dee seit nu meist twintich Joah pienich fe eare Karriere jeoabeit hawe. Gaunz feine plautdietsche Mensche, dee weete, opp woone Sted daut Hoat schleit. Schissjat, waut were daut fe scheene Tiede.
Doamett ons daut Spell uck noch no Joatiehnde vel Spoß moakt, musst wie dee Reajle stendich ve-endere. Irjendwann hab wie tom Biespell daut Beede vebetat, enndem wie – soo aus biem Pokern – Chips ennfehde. Nu mott maun uck eenen Chip betohle, wann maun hundattachentich saje well. Dee Chips tjricht maun oba moa, wann maun Spells jewennt. Doamett woare dee domme Spelwiese doppelt bestroft, en soone Mensche, dee emma ennt Loch gohne, tjene irjendwann nich meea beede. Wie moake ons uck nieje Ereijniskoate: Dee scheene Paunzakoate, dee daut Spell vonne aundre kaputt scheete tjene. Aundre Reajle en Meajlichtjeite: „Du mottst ohneTrumpf spele“ oda „Root en Jreen sent eene Foaw.“ Dietschlaunt, Russlaunt, Paraguay, ess daut scheen, wann du jemaund soo jraßlich dommlehre kaunst.
Daut Baste noch beta jemoakt
Soo hab wie daut baste Spell vonne Welt noch een bestje beta jemoakt. Daut Probleem ess nu, daut disse scheene Spelwies moa fief Profis – de meschte sent soogoa uck Weltmeista – spele tjene. Daut moakt ons oba goa nuscht, soolang it ons Spoß moakt. Uck doa sent wie rechtje Menniste.
El pinguino