Hermann Schirmacher (57) ess aum 2. August 2024 noh eene schwoare Krankheit em Klinikum Bielefeld-Mitte em Biesenne von siene Familie jestorwe. Schirmacher wee een Missionoa, dee Mensche enn Ekuador, Peru oda Haiti theologische, technische, medizinische oda organisatorische Unjastettung en Halp gauf. Besondasch bekaunt ess hee bie dee Menniste auls Metoabeida bie Radio HCJB en Quito, Ekuador.
Hobby: mennische Familjeforschung
Schirmacher kaum uck auf en too mol to dee Veaunstaultunge von „Plautdietsch FRIND“. Hee haud een besonderet Interesse fe Familjeforschung, daut heet, he beschafticht sich mette mennische Jeschicht en uck met Plautdietsch. Auls dee Willy Vogt, Bedriewa vonne seeha bekaunde Sied chortiza.org storf, ewanohm Schirmacher Oppgowe fe disse Homepage.
Schwoare Tjindheit von Schirmacher
Jebore word hee enn Volendam, Paraguay am 6. Mai 1967. Hee erlewd eene schwoare Tjindheit, siene Familje trock noh Brasilien, lota kaum Hermann Schirmacher noh Dietschlaunt, woo aul sien Broda Hartmut en sie Voda lewde. Enne Mennonitenjemeinde Bechterdissen fung hee sien jeistijet Tus. Doa lehd hee uck siene lotere Fru Irene tjane, dee ahm bie vel Unjanehmunge bejleit.
Utbildung: Von Bibelschol bet IT
Siene Utbildung mok hee opp veschiedne Weaj: Bibelschool oppem Bienenberg; Praktikum enne Mennonitenjemeinde Bechterdissen; Sprachstudium enn Costa Rica; eschta Missioonsensatz enn Peru; Utbildung em IT- en Elektrobereich bie Nixdorf enn Paderborn.
Utsendung von Bechterdissen
Aunfong Mai 2001 fung hia enne Jemeinde dee Utsendung en dan dee Utreis vonne Familje met dee fief Tjinja Matthias (II), Christa (9), Johannes (7), Thomas (5) en Tamara (3) noh Ecuador staut. Doanoh we Hermann toop met siene Fru Irene enn Ekuador en oabeid opp veschiedne Jebiete.
Oabeit fe HCJB en vele aundre
Enn Ecuador we hee maßgeblich aun disse Projatjte bedeelicht: Aufjeleajne Darpa met reinet Wota vesorje; dee Organisation von bediedende Ve-aunstaultunge biem Radiosenda HCJB en dee Koordinierung von medizinischa en evangelistische Halp en Ewaschwamungsjebiete. Enn Ekuador we een bediedendet Projatjt dee Ennrechtung von eenem Plauntehus, om Plaunte fe Dschungelgoades to zichte. Hermann paust opp, daut Funkttorms funktioniede, wiel doamet daut Evangelium en aufjelejne Jebiete ewadroacht woat. En Projatjt, daut Hermann besondasch aum Hoat lach, we dee Bu von eenem reinen Wotasystem en eenem aufjeleajnen Darp enn Ekuador. Hermann leid uck medizinische Teams noh Haiti, woo hee wichtje Unjastettung bie dee Onruhe noh dee Wohle en bie dee Cholera-Vebreedung leist.
Krank enn Ekuador
Hermann we em Juli 2024 enn Ekuador, feehld sich meed en tjrech Feeba. Met disse Symptome word hee em Krankenhus enn Quito Enj Juli oppjenohme. Siene Blootwete en sien Toostaunt veschlajchtede sich soo stoatj, daut heee sich noh Dietschlaunt transportiere leet, woo hee enn Bielefeld behaundelt word. Dee Diagnose kaum eenen Dach noch sienem Doot: dee Grund we een Tjreft – een Anaplastiches Multiples Myelom.
Bejrafnis von Schirmacher ohne Trua-Tjleedung
To sienem Bejrafnis we dee Tjoatj enn Bechterdissen proppend voll. Schirmacher selfst haud noch ver sienem Dood doarom jebet, daut maun nich enn Trua-Tjleedung tom Bejrafnis tjemmt.